Eventi +/-
en historio
ye 10 di oktobro …
1659. En Batavia (nuntempa Jakarta), la Nederlandana deskovristo e komercisto Abel Tasman mortis. En 1642, dum navala expediciono, il vidis la westala rivo di la insulo qua nuntempe havas la nomo Tasmania. Il facis ca expediciono por la Vereenigde Oost-Indische Compagnie di Nederlando; la kompanio esperis ke nova regioni por komerco esos trovata. Dum plura dii Tasman exploris la insulo; pose il segliris vers la esto e ye 13 di decembro 1642 il vidis la sudala insulo di Nova-Zelando (tale ol plu tarde esis nomizata). Ta okazioni esas la unesma registragita viziti di Europani ye Tasmania e Nova-Zelando.
1780. En la Karibeano, granda uragano komencis. Ol frapis Barbados ye ca dio, kun venti di plu kam 320 km/horo, e pasis tra vicina insuli. Ol plu tarde frapis Porto-Riko ed esta Hispaniola. Eventante dum la Amerikana Revoluciono, ol grave domajis floti di Britania e Francia, qui esis rivali en la regiono. La uragano duris til 16 di oktobro; cirkume 20000 homi mortis. Ol esis la maxim mortigiva uragano di la Atlantiko.
1846. Tritono, satelito di la planeto Neptuno, esis deskovrata da Britana amatora astronomo William Lassell, 17 dii pos la deskovro di Neptuno. La satelito esis nomizata Tritono multe plu tarde, kande duesma satelito Nereid esis deskovrata en 1949. Tritono esis unika granda satelito en la sunala sistemo, pro ke olua orbito havas altra sinso kam altri. La orbito esas preske cirklatra.
